//ప్రయాణం//

అర్ధ చంద్రాకారంలో
రెండు జళ్ళ మద్య
కనకాంబరాల దండ
నవ్వుతోంది అంటే
కోపంగా నీ చూపులు
విసురుగా నీ నడకలు
..........................

రాత్రి దొంగాటలాడుతూ
కొట్టు గదుల దగ్గర
మీ నాన్నకు దొరికితే
నీ కోసం వచ్చానని
కొట్టిన కవిసీకర్ర దెబ్బలూ
...........................

బుట్టలో కూర్చొబెట్టి నిన్ను
మేనమామలు తీసుకొస్తుంటే
కర్పూరం పుల్ల చూసి
పుల్ల ఐస్ కావాలని తోడిపెళ్ళికొడుకు
ఏడుపులు నీ నవ్వులు
...........................

తొలిరాత్రి మల్లెపూలు
తురుముకోమంటే జడలో
కనకాంబరాలు లేవని
అత్తగారి మీద అలిగి
నువ్వు పెట్టిన బుంగమూతి
..........................

హైదరాబాదు కొత్త కాపురం
నెలాఖరున మజ్జిగ తాగి
నిద్ర పట్టక రాత్రంతా
చెప్పుకొన్న కబుర్లు
..........................

పెద్దొడు పుట్టినప్పుడు
నీ పోలికా, నాపోలికా
ఎవరినీ వదలక తడుపుతుంటే వాడు
వేంకటేశ్వర స్వామి పేరు
పెట్టమన్న పంతులు
...........................

కూతురు సవత్త బంతికి,
ఊరంతా బంతి భొజనాలయ్యాకా,
నాకింక నగలొద్దని
నువ్వు చేసిన శపధం,
మర్నాడే రేటు పడిపొయిన బంగారం
...........................

పిల్లలిద్దరి కొత్త కాపురాలు
ప్రవాసాంద్ర విమానం
అమెరికా ఎగిరిపోయాకా,
మిగిలిన మనమిద్దరం
అవే పాత ఆశలు
............................

చిలక పలుకులు మానేసి
తీపి(sugar)గతంలో మునకేసి
నీకు లాభిస్తుందా పోగొట్టుకొని,
హైదరరాబాద్ ఎందుకురా ఎదవా?
ఆరొజు తాతయ్య కోపం(B.P)
నాకు లభించిన బహుమతి
............................

చెరుకువాడలో మొదలుపెట్టి
హైదరాబాదు గల్లీ వరకు
చెట్టాపట్టాలేసుకొని తిరిగిన
మనం ఒకే I.C.Uలో
ఇంతకన్నా ఏముంది ఆనందం
............................

అమ్మాయీ, అబ్బాయీ వచ్చారు
నినొక్కద్దాన్నే తీసుకెల్తున్నరే!
ఇదిగో వస్తున్నా ఉండు,
బొట్టు పెట్టి, మంగళ సూత్రం
ఉందో లేదో చూసి,
స్తానం చేయించి, కొత్త బట్ట కప్పి,
ఆఖరి పిడక పేర్చాకా,
వగరుస్తూ వచ్చిన వార్త విని
నాన్నా ఒక్కడివే ఆసుపత్రిలో అంటూ
ఏడుస్తాడెందుకు పిచ్చి సన్నాసి.,

పెళ్ళి నాటి ప్రమాణం కొద్దీ
నీతోనే చేస్తున్నాను కదా ప్రయాణం,
కాస్తాగు నా పార్దీవదేహం వచ్చేవరకు
ఆఖరి అగ్నికీలలో రమిద్దాం...


02.07.2013.